La tute unua prelego, kiun mi vizitis komencante miajn studojn de klasika filologio en Brno, estis tiu de la fama kembriĝa profesoro John Chadwick, unu el la deĉifrintoj de la kreta skribo „Linear B“. Al Brno invitis lin lia kunlaboranto kaj amiko prof. Antonín Bartoněk, ĉe kiu mi sekve studis kaj doktoriĝis. Ankaŭ li estis internacie estimata specialisto pri skriboj kaj kulturoj de Mikeno kaj Kreto, aŭtoro de la grava „Handbuch des mykenischen Griechisch“ (Manlibro de la mikena greka lingvo), poligloto, membro de multaj internaciaj societoj kaj gastprofesoro de grandaj univerzitatoj. Li instruis dum sia tuta vivo en Brno, edukinte generaciojn de klasikaj filologoj.

La revolucia malkovro, en kiu mia profesoro kunagis, estis la nova datumo de la greka skribo. Ĝis la 1950-aj jaroj oni kredis, ke la grekoj dekomence estis skribintaj per alfabeto adaptita el la fenica skribo ĉ. 850-800 a.K. Neniu suspektis, ke jam ĉ. 1450 a.K., kiam Mikeno koloniigis Kreton, la grekoj adaptis la lokan (ĝis nun nedeĉifritan) skribon indikotan „Linear A“, kaj ekskribis sian lingvon en „Linear B“. Ili do scipovis skribi jam ĉ. 600 jarojn pli frue ol konate! Kiam arĥeologo Arthur Evans elfosis la unuajn argiltabelojn en la palaco de Knossos komence de la 20-a jarcento, li jes ja rekonis sur ili diversajn skribojn, sed nesukcesis deĉifri ilin. Kiam en 1952 juna arĥitekto Michael Ventris publikigis sian supozon, ke la „Linear B“ estis servinta al la greka lingvo, la fakuloj hezitis kredi tion. Kun helpo de profesiaj filologoj, i.a. John Chadwick kaj Antonín Bartoněk, oni konvinke pruvis tiun sensacian fakton.

En mia prelego, mi uzos publikaĵojn de mia profesoro kaj aliajn fontojn por vidigi historion de malkovro de la pragrekaj kulturo kaj civilizo, mi parolos pri mitologiaj rakontoj, pri arkeologiaj kaj filologiaj hipotezoj, historiaj enigmoj, supozoj kaj faktoj.