Siatempe Alfred Hermann Fried (1864-1921), nobelpremiito de la jaro 1911, estis unu el la plej elstaraj pacifistoj. Komence de la 20-a jarcento, kiam li ekokupiĝis pri Esperanto, li ellaboris pacifisman koncepton, “La fundamentoj de la revolucia pacifismo” (1908). Ĝi estas rigardata kiel la unua pacifisma ideologio, kiu kombinis sciencajn ambiciojn kun mondkoncepta bazo kaj politika programo. Pro tio Fried estis unu el la internacie gvidantaj pacifistoj, kiam la unua mondmilito “eksplodis”. Kiun planon li nun proponis por realigi pacan mondon?

La prezentado skizos la biografion de Alfred Fried kaj precipe prezentos lian rilaton al Bertha von Suttner, la “revolucian pacifismon” kaj lian rilaton al Esperanto. Interalie ĝi traktos jenajn demandojn: Kio estis la enhavo de lia pacifisma koncepto kaj kion li konkrete proponis por paca mondo? Kiun rilaton li havis al Esperanto, kiel li pensis kaj parolis pri ĝi? Ĉu Esperanto ludis iun rolon en lia pacifisma koncepto? Kiamaniere kaŭzis la unua mondmilito ŝanĝon de lia pacifisma teorio? Kiun influon havis lia pacifismo, kio el ĝi realiĝis dum la 20-a kaj 21-a jarcentoj?