La demando ĉu ekzistas vivo ekstertera estas multjara, sed en la lastaj kvin jaroj aperis novaj esploroj kiuj proksimigas nin al la respondo. Astronomoj kaj astrobiologoj havigis sciencajn respondojn kaj faktojn kiuj ĝis antaŭ dudek jaroj ŝajnis ne atingeblaj. Ekzemple, oni trovis ke multaj steloj (foraj sunoj) havas planedajn sistemojn kiel nia sunsistemo, inkluzive de planedoj similaj al Tero, kun kondiĉoj taŭgaj por evoluo de vivo. En nia sunsistemo oni lastjare unuafoje observis signojn de likva akvo sur la planedo Marso. Astronomoj trovis oceanon en la jupitera satelito Eŭropo kaj lagojn de likva metano kaj organikajn molekulojn sur la saturna satelito Titano. En foraj sunsistemoj la spac-teleskopo Kepler trovis milojn da planedoj, pluraj el ili similaj al Tero kaj taŭgaj por vivo. En nova esploro, publikigita lastjare en la prestiĝa Internacia Ĵurnalo de Astrobiologio kaj ankaŭ en Esperanto (2015:9) kaj Kontakto (2015:5-6), A. Wandel montris ke planedoj kun vivo (almenaŭ primitiva) estas verŝajne iom abundaj kaj troviĝas eĉ en relative proksimaj sunsistemoj. La IKU-prelego prezentos tiujn novajn observojn kaj esplorojn por laikoj. La sekvaj du AIS-prelegoj pritraktos pli detale la vivo-perspektivojn en nia sunsistemo kaj la serĉadon de vivo-taŭgaj planedoj en aliaj sunsistemoj.