Ni estas ĉirkaŭitaj de strukturoj gravaj por la sekureco, kaj ni uzas ĉiutage maŝinojn espereble longedaŭrajn. La serio de prelegoj celas klarigi la problemojn kaj la metodojn en la kampo de materialoj kaj strukturoj. Inter la mekanikaj proprecoj de diversaj materialoj, la plej kutimaj estas rezisto al tiro, premo aŭ ŝiro. La ŝarĝoj povas esti statikaj aŭ dinamikaj ; en la lasta kazo okazas laciĝo kaj fine post elĉerpiĝo, rompiĝo. Estos prezantataj la metodoj por mezuri la proprecojn de la materialoj. En la dua parto estos klarigataj la metodoj por kalkuli strukturojn. Ili baziĝas plej ofte sur la teorio de elasteco. La nocioj de streĉo kaj deformo estas esencaj kaj facile kompreneblaj ; la kalkulo adoptas la leĝon de Hooke, laŭ kiu la deformo estas proporcia al la streĉo. Ni vidos kiel distribuiĝas la streĉo en stangoj, traboj kaj kadroj. Pli komplika nepre evitinda kazo estas la knikado de longaj fostoj, tio estas la perdo de elasta stabileco. Poste ni vidos la fenomenon de vibrado de simplaj aŭ komplikaj strukturoj kaj la nociojn de propra frekvenco kaj resonanco . Fine Hannes montros la problemojn de strukturoj enhavantaj fendojn, kiujn oni scias pritrakti per la scienco de mekaniko de rompiĝo. La prelegoj estos ilustrataj per multaj desegnaĵoj kaj bildoj aŭ filmetoj pri katastrofaj kolapsoj okazintaj ne nur antaŭ longe, kiam oni ankoraŭ ne konis la sciencon de mekaniko de la strukturoj, sed eĉ lastatempe.