Kune kun la 125-a jubileo de Esperanto, ankaŭ la Internacia Kongresa Universitato (IKU) markas iom "rondan" jubileon – la 65-an. La IKU ĉi-jara estas varia kaj altnivela kiel kutime. Apud oftaj popularaj IKU-prelegantoj, kiel Tonkin (Esperanto-literaturo), Fettes (Lernejo kaj naturo en ekologia krizo) kaj Pietlainen (ĵurnalismo translimen) prelegos eminentaj esperanto-verkistoj apenaŭ videblaj en IKU kiel Laŭlum (Lingvo, kulturo, literaturo) kaj Trevor Steele (Malapero de la aborigenoj) kaj junaj ,talentaj fakuloj novaj por IKU, kiel Francesko Maurelli (Robotiko), Jonatan Cooper (Moderna arto) kaj Gabor Markus (Kiu kontrolas la registarojn?).

Kiel kutime okazos AIS-sesio kun tri kursoj, kiuj konsistas el po tri prelegoj: unua enkonduka IKU-prelego kaj du daŭrigaj prelegoj, en kiuj la preleganto povos pli profunde kaj vaste prezenti la temon. La partoprenantoj en la AIS-kurosoj povos ekzameniĝi por akiri AIS-ateston.

La resumoj de la prelegoj havas tradukojn en la angla, la franca kaj la vjetnama. Tiel la IKU-libro povas esti utiligata por demonstri la sciencan, fakan kaj edukadan aplikadon de Esperanto al eksteraj instancoj, kiel Unesko kaj scienc-rilataj kaj universitat-rilataj organizaĵoj.

Fine mi havas la plezuron danki al la kontribuantoj kaj kunlabornatoj kiuj ebligis la aperon de tiu-chi libro: miaj gekolegoj en la IKU-komisiono, kiuj havis la malfacilan taskon prijuĝi la prelego-proponojn, la prelegantoj, kiuj preparis siajn prelego-tekstojn, la redaktoroj, Pasqualle Zapelli kaj Roy McCoy kaj la provleganton Rob Moerbeek.

Amri Wandel
Estrarano pri scienca kaj faka agado kaj IKU-sekretario