Mi eklernis Esperanton en 1950, estis prezidanto de la Studenta Esperanto-Klubo, partoprenis en la UK en Bologna en 1955, kaj en Kopenhago en 1956 kaj 1962. Mi estas membro de la Internacia Scienca Instituto Ivo Lapenna.  Dum sesdek jaroj mi renkontis esperantistojn ĉie en la mondo (Germanio, Svisio, Italio, Jugoslavio, Aŭstrio, Sovetunio, Usono, Aŭstralio, Japanio, Ĉinio). E-o fakte estis grava parto de mia tuta vivo kaj mi flue parolas la lingvon.

Mia scienca laboro ĉefe temas pri astrometrio, t.e. la mezurado de pozicioj, movadoj kaj distancoj de steloj. Mi inventis novajn instrumentojn por uzado sur la Tero kaj en la satelitoj Hipparcos kaj Gaia de ESA. Kun diversaj grupoj mi gvidis la konstruadon de la instrumentoj, la observadon de la steloj, kaj la publikigadon kaj uzadon de la rezultoj.

Naskita en Danlando 1932. Studis en la Kopenhaga Universitato 1950-56. Scienca laboro 1958-73 en la Hamburga Observatorio, Germanio, kie mi estis "Hauptobservator". Asocia profesoro en la Kopenhaga Universitato 1973-2002. Gastprofesoro en la universitatoj de Tokyo, Tübingen kaj Strasbourg. Prezidanto de la Komisiono por Pozicia Astronomio de la Internacia Astronomia Unio (IAU) 1979-82; prezidanto de la studgrupo por horizontaj meridianaj cirkloj de IAU 1973-89; prezidanto de Dana-Ĉina Meridiana Teleskopo 1980-90; prezidanto de du eŭropaj organizaĵoj, kiuj faris la sciencan analizon de la datoj de la satelito Hipparcos 1982-97; ĉefo de la projekto de la katalogo Tycho-2 por 2.5 milionoj da steloj 1996-2001; ĉefo de la fotometria grupo de la Eŭropa Spaca Agentejo (ESA) por la satelito Gaia 2001-07. Membro de la sciencaj gvidgrupoj de ESA por la du satelitoj Hipparcos kaj Gaia 1975-2007. Mi gvidis la laboron pri la instrumentoj kaj la datenanalizo de la observoj. Ricevis en 1999 la "Medalon de la scienca direktoro por elstara kontribuo al la scienca programo de ESA". Ricevis en 2009 la Struve-medalon de Rusio pro miaj kontribuoj al astrometrio de la Tero kaj de spaco. La Internacia Astronomia Unio (IAU) antaŭ kelkaj jaroj honoris mian sciencan laboron kaj donis la nomon "Erikhøg" al asteroido, tio estas planedeto inter Marso kaj Jupitero.