En sia 30-jariĝo, la tutmonda epidemio de Aidoso daŭre defias la tutan homaron kiel unu el ĝiaj plej seriozaj problemoj, kies pluraspekte malutila efiko montriĝas aparte grava por iuj regionoj kaj homgrupoj, kiel la junularo en subevoluintaj landoj. Fakte, el 33,4 milionoj da homoj nun vivantaj kun la homa imunodifekta viruso (HIV), 4,9 milionoj estas en la aĝo inter 15 kaj 24 jaroj, el kiuj 80% loĝas en Afriko sude de Saharo. Tra la mondo, ĉiun tagon ĉirkaŭ 3 000 junuloj estas infektitaj per HIV, kaj tiu aĝgrupo koncentras 40% el ĉiuj novaj HIV-infektoj. Junaj inoj estas aparte vundeblaj, pro biologiaj kaj sociaj faktoroj, kiuj kune rezultas en tio ke je monda skalo, 66% el la HIV-infektoj ĉe junuloj trafas junajn virinojn. Indas la demando pri la ĉi-kaza efiko de situacioj kiel seksa ekspluatado, perforta mistraktado, malegala aliro al edukado kaj aliaj laŭgenraj subpremoj. La batalo kontraŭ tiu ĉi malsano kaj la amasa homa suferado kaŭzita de ĝi, aparte ĉe la junularo, bezonas ne nur biomedicinan reagon, sed ankaŭ decidan agadon kontraŭstare al la maljustaj genraj, ekonomiaj kaj kulturaj rilatoj kiuj staras en ĝiaj kompleksaj kaŭzaj retoj.