Ĉiuj konas la Centran Oficejon de UEA en Roterdamo. Malpli konata estas ĝia anekso en Amsterdamo, kvankam ĝi ekzistas jam de 20 jaroj. Precize en la somero de 1980 ĝi komencis sian funkciadon. Nu... vera oficejo ĝi ne estas. Nur unu ĉambro. Tiaj "oficejoj" abundas en nia movado. Ĉiu aktivulo en Esperanto Nederland havas tian "oficejon": ĉambro kun paperoj kaj maŝinoj.

Tamen, kara leganto, mi bezonas vian atenton por tiu ĉambro en Amsterdamo, kie komenciĝis la novstila afrika agado de UEA en 1980. Bonvolu sekvi min, eniri kaj aŭskulti min. Ne estas loko por eksidi, sed mi klopodos tedi vin mallonge.

Esperanto en Afriko disvastiĝis depost 1980 multe, kaj (ni esperu) definitive. Ne estas malfacile trovi lernantojn en tiu kontinento: ili svarmas en klasĉambro aŭ en mia leterkesto. Multaj estas junaj; ili esperas per tiu nova lingvo ligi kontakton kun la vasta mondo. Precipe kun la riĉa mondo. La mis-supozo ke Esperanto kondukas al postenoj, stipendioj kaj vojaĝoj kaŭzas foje seniluziiĝojn. Sed krom seniluziiĝoj okazis ankaŭ multaj mirakloj. Foje iu aŭ alia mia amiko konfidas al mi, ke Esperanto ŝanĝis lian vivon.

Revuo Esperanto de januaro 1990 publikigis la ĉefartikolon "Por plia jardeko da Esperanto en Afriko". Ĝi resumis la spertojn de unu jardeko kaj skizis la agadprincipojn por sekvonta jardeko. Se vi volas ricevi ĝin, petu ĝin de mi. Se hodiaŭ mi devus verki novan "Por plia jardeko da Esperanto en Afriko", mi verŝajne invitus iujn el miaj afrikaj kolegoj fari tion anstataŭ mi. Ili ekzistas kaj laboras. Ili instalas la movadon en sia kontinento, iuj jam dum dudek jaroj.

Legantoj de la nederlanda Esperanto-revuo Fen-X regule trovis artikolojn de afrikaj aŭtoroj en sia revuo. Ili do jam gustumis tiun kontinenton. Pluraj nederlandaj esperantistoj delonge rilatas "ĝemele" kun afrikanoj, ekzemple en Niĝerio aŭ en Malagasio (Madagaskaro). En Nederlando jam prelegis afrikaj gastoj, ekzemple Jean Codjo, Raoul Hounnake, Gbeglo Koffi. Jean Codjo revenis al sia lando, Benino, kaj ĵus informis min pri siaj mirindaj progresoj tie. Per la helpo de manpleno de germanaj esperantistoj (li vizitis Germanujon dum duonjaro) li instalis oficejeton, kiu jam funkcias kiel retpoŝta stacio por multaj lokaj esperantistoj. Li ĵus konstruis unuklasan lernejon en vilaĝo Codji, kie en oktobro 150 infanoj komencis lerni surpaperigi siajn pensojn kaj esti kleraj por decidi por si mem. Ili samtempe alkutimiĝas al Esperanto, sed ne estas devigataj lerni ĝin. Tia lernejo estas io tre bona kaj fierinda. Kiam alvenos fotoj kaj novaj informoj, tiuj eble vekos pli da subtenemo en Germanujo kaj aliloke.

Subtenado per amika korespondado, per koresponda instruado, kaj... per mono, estas la ŝlosilo por sukcesigi tiun mirindan laboron. Kara leganto, por ne tedi vin tro longe, mi donos al vi mian dezirliston de donacoj por la dudekjara jubileo.

• Lernejo en Lome, Togolando: 50 000 gld.
• Tekformataj komputiloj por diversaj landoj: po 3 500 gld.
• Abonoj al la revuo Kontakto po 20 gld. jare.

Pri la Revuo Kontakto vi sciu, ke post jardekoj da donaca abonado de proksimume 200 ekz. jare, nun ni devas rompi tiun tradicion. La donacoj al Fondaĵo Afriko tiel akre mankas ke ili ne plu kovras la kreskantan monbezonon. Reage al tio, jam unu nederlanda esperantistino spontanee donacis abonojn de Kontakto kaj de El Popola Ĉinio al ĉiuj kluboj en Madagaskaro. Kompreneble, vi ankaŭ povas sendi vian propran ekzempleron, leginte ĝin, al via afrika korespondanto.

Eble vi ridas, vidante: Lernejo - 50.000 gld. Sed en la prosperega parto de la mondo tiaj sumoj jam ne estas fantaziaj. Foje riĉaj esperantistoj donacas aŭ heredigas grandajn sumojn, ekzemple por aĉeti domon.

Ni devas plu certigi al la afrikaj aktivuloj, ke ilia laboro trovas simpation kaj subtenadon. Vi povas fari tion per donaco al Fondaĵo Afriko de UEA pere de la kotizperanto de UEA en via lando aŭ rekte al iu el la poŝtaj aŭ bankaj kontoj de UEA (vd. Jarlibron 1999, p.37-38.), ne forgesante mencii la celon "por Fondaĵo Afriko".

Se vi deziras pli da informoj aŭ se vi havas konsilojn aŭ proponojn, mi volonte estos je via dispono. Jen mia adreso: Kastelenstraat 231, NL-1082 EG Amsterdam, Nederlando; telefono kaj fakso + 31 20 6421853.

Hans Bakker Komisiito de UEA pri Afrika Agado