Dokumenta kurtfilmo pri la la 110-a Universala Kongreso en Brno, Ĉeĥioo, kiu okazis de la 26-a de julio ĝis la 2-a de aŭgusto 2025. Aliĝis 1132 homoj kaj la temo estis: Esperanto kaj teknologioj kiel pontoj de paco kaj konfido inter la popoloj Pliaj informoj: https://www.uea.org/kongresoj/UK/2025 Filmo farita de Rogener Pavinski. Subtekstigu la filmon en via lingvo, elŝutu la transkribitan dosieron:https://drive.google.com/file/d/1VVRt9ck0DPAPNxIxkutO3tcJYTHt6Upv/view?usp=sharing Uzu teksto-redaktilon kaj traduku (sen ŝanĝi la tempo-indikojn) kaj sendu retpoŝte al rogener(ĉe)ikso(punkto)net Tiu ĉi filmo samkiel aliaj registraj agadoj de la UK estas eblaj danke al donacoj. Eblas donaci dum aliĝo al la UK, rekte per la aliĝilo, aŭ konstante, al la fondaĵoj de UEA: https://uea.org/alighoj/donacoj - diversaj fondaĵoj subtenas la kongresan agadon kaj eblas elekti unu aŭ plurajn.

Reta memorkunveno por Renato Corsetti kun ĉeesto de liaj familianoj kaj partopreno de ĉ. 90 homoj en la 1-a de feb. 2026

PREMIO MAERTENS 2026 Komuniko de la juĝkomisiono La Premio Grégoire Maertens celas premii esperantistajn organizaĵojn aŭ individuojn, kiuj per siaj realigoj grave kontribuis kaj plukontribuos al la evoluigo de la Esperanto-movado. Pri la ricevantoj de la premio decidas komisiono konsistanta el eksaj prezidantoj de UEA, eventuale kun la kunlaboro de aliaj eksaj estraranoj de UEA. Malsame al aliaj movadaj premioj, la Premio Maertens metas emfazon ne nur al la jamaj atingoj, sed ankaŭ al la potencialaj estontaj kontribuoj de la premiito; simbole, oni anoncas ĝin en la unua tago de la nova jaro—kiu ankaŭ, nehazarde, estas la naskiĝtago de la nomdoninto. La Premio Grégoire Maertens por la jaro 2026 estas aljuĝita al: Alekso Miller pro lia rimarkinda laboro sur la kampo de la Esperanta video-arto, kiu malfermas novajn vojojn en la informado, instruado, uzado kaj ĝuado de la lingvo. Kreskinta en la usona ŝtato Minesoto, Alekso diplomiĝis en orienta Usono pri teatro kaj nun loĝas en Atlanto, Georgio. Tiu urbo estas la dua grava centro de filmproduktado en Usono, kaj Alekso ne nur aktoras en diversaj filmoj kaj teatraj prezentoj, sed akiris la necesajn kapablojn por mem reĝisori kaj produkti filmojn, kadre de vigla loka komunumo de kin-laboristoj. Konatiĝinte kun Esperanto en 2013, kaj spertante ĝian vivantecon en la somera kursaro NASK en 2016, li ekvidis en ĝi invitan terenon por videokreado. Inter liaj multaj kontribuoj al la evoluigo de tiu kampo, elstaras la jenaj: - la jutuba kanalo Exploring Esperanto ("Esplori Esperanton"), jam kun pli ol 380 videoj kaj 8200 abonantoj; - la Usona Bona Film-Festivalo, kiu jam atingis sian 7-an eldonon kun pli ol 200 filmoj el la tuta mondo, el kiuj la plej populara atingis jam pli ol 63.000 spektojn; - la realigo de plena profesinivela filmo de la teatraĵo "1910" el la Universala Kongreso en Montrealo en 2022. Ĉiu el tiuj diversaj projektoj estas mem plurfaceta, servante kiel modelo kaj inspiro por vastiĝanta filmkulturo en Esperanto. Ekzemple, la videoj ĉe Exploring Esperanto uzas diversajn formatojn, inkluzive de mallongaj vertikalaj videoj por tre mallongaj "kapsulaj" videoj (multaj el tiuj estas pri la ĝusta vortouzo de iu Esperanta vorto). La filmoj estas ĉiaspecaj: jen distraj, jen edukaj, jen plene esperante, jen angle kun esperantaj subtekstoj. Estas aŭdiolibroj, atentokaptaj mallongaj filmoj, estas registraĵoj de koncertoj, skeĉoj, improvizaj humuraĵoj. La vigleco kaj vario en si mem kreas allogan bildon pri la lingvo kaj ĝia kulturo. Prizorgante la Film-Festivalon, en kiu partoprenas homoj el la tuta mondo, Alekso ankaŭ helpis plibonigi la filmojn kvalite, per konsiloj kaj praktika helpo, same per prelegoj pri filmado, muntado, redaktado de sono, ktp. Li krome zorgis, ke la Festivalo ne dependu de li, kaj efektive la lastaj du eldonojn organizis aliaj, dum li mem plu senlace kuraĝigas kaj subtenas kaj la organizantojn kaj hezitemajn filmemulojn. Enplektante siajn aktorajn amikojn kaj konatojn en la produktado de filmoj en Esperanto, li cetere signife popularigis la lingvon en la Atlanta kino-komunumo. Pinto de tiu filmproduktado ĝis nun estas la filmo de la originala teatraĵo "1910", por kiu Alekso utiligis kvar kameraojn, redaktis la sonon, kaj faris la finan muntaĵon, inkluzive de intervjuetoj kun la aktoroj kaj la verkistino Ĵenja Amis. La fina produkto estas spektebla ĉe lia jutuba kanalo (jam 7.300 spektoj). Tamen, kredante je la valoro de fizikaj realigoj, disvastigeblaj sendepende de la retaj entreprenoj, Alekso krome pretigis la filmon por eldono sur Blu-radia disko kun multaj aldonaĵoj kaj subtitoloj en ok lingvoj. Pri ties eldono nun respondecas Esperanto-USA. Per sia talenta laboro, Alekso Miller signife plialtigas la nivelon de la Esperanta filmkulturo kaj sendube stimulos ĝian pluan evoluon en la venontaj jaroj. La aljuĝo de la dua Premio Grégoire Maertens, kun mona subteno de €1.000, celas rekoni lian elstaran kaj daŭrontan kontribuon. Kelkaj ligiloj al projektoj menciitaj en la teksto: - https://www.youtube.com/@ExploringEsperanto - https://www.youtube.com/@EsperantoUSA (ludlistoj de la Film-Festivalo troveblas ĉi tie) - https://www.youtube.com/watch?v=fbWldQKlfrA (La plena teatraĵo "1910")

Solidareco milittempe: UEA vokas al subteno por esperantistoj en D. R. Kongo tra la Konto Espero! Donacu al la Konto Espero: https://uea.org/alighoj/donacoj/espero Universala Esperanto-Asocio (UEA) per sia Konto Espero daŭrigas solidaran agadon por subteni individuajn membrojn de la Asocio, kiuj troviĝas en la plej bezonataj situacioj pro armitaj konfliktoj kaj humanitaraj krizoj. Tiu solidareca alvoko estos akompanata de speciala kultura gesto: en nia jutuba kanalo aperas muzikvideo de la kanto “Milittempe”, interpretata de Joel Muhire kaj Miriam Ingabire Alliance, esperantistaj kantistoj el D. R. Kongo. La kanto premieriĝis dum la malfermo de la 6-a Virtuala Kongreso de Esperanto kaj nun estas prezentata aparte – kiel necesa voĉo de espero, eltenemo, homa proksimeco kaj konfirmo de niaj valoroj en tempo de sufero. Pere de zorge kolektitaj informoj ekde marto 2025, jam eblis helpi ĉirkaŭ 28 individuajn membrojn de UEA en Demokratia Respubliko Kongo, ĉefe en la urboj Goma kaj Bukavu, regionoj forte trafitaj de perforto kaj malstabileco. Al tiuj helpitoj UEA sukcesis sendi monhelpon de 100 eŭroj. En regiono, kie granda parto de la loĝantaro vivas sen stabila formala enspezo kaj kie multaj familioj devas kontentiĝi per tre limigitaj rimedoj, tia sumo povas havi realan kaj tujan efikon: por multaj ĝi signifas subtenon por bazaj bezonoj dum unu aŭ eĉ du monatoj, ekzemple por manĝaĵoj, loĝkostoj, sanelspezoj aŭ edukaj bezonoj. En kondiĉoj de milito kaj delokiĝo, tiu helpo ofte estas decida por travivi malfacilan periodon kun minimuma digno. UEA nun celas etendi tiun solidaran helpon al ankoraŭ aliaj individuaj membroj, kiuj daŭre suferas pro militoj kaj perfortaj konfliktoj en diversaj regionoj de la mondo. Tial la Asocio alvokas la tutmondan Esperanto-komunumon kaj aliaj homoj de bona volo kontribui al la Konto Espero, por ke neniu membro restu sola fronte al tiaj malfacilaj provoj. Per tiu iniciato UEA volas memorigi, ke Esperanto ne estas nur lingvo, sed ankaŭ komunumo de reciproka zorgo. En la strategia plano de UEA por la periodo 2025-2030, nome AKIRI, solidareco estas unu el la referencaj valoroj. Eĉ kiam la helpo estas modesta laŭ ciferoj, ĝi povas esti profunde esperodona gesto por tiuj, kiuj sentas sin forgesitaj de la mondo. Do ĉiuj donacoj gravaj. Se donacoj alvenos abunde, ankaŭ eblos pensi agadojn krom la referenca helpo de po 100 EUR por helpito. Kiel same jam memorigis nin Joel Muhire: UEA estas nia, UEA estas vi - https://youtu.be/B5TB6P_ka5M?si=PCXptFGeHqbDX_VA Kune ni povas mildigi maljustaĵojn kaj konservi esperon – en milittempoj ni devas eĉ pli konfirmi nian forton, kio en la aktvismo de la Esperanto-movado ĉefe estas la forto de espero.