En la Berlina UK oni anoncis por la 50-a fojo la rezultojn de la Belartaj Konkursoj de UEA. La festan karakteron pligrandigis la sam-okaza lanĉo de "Lingva arto", festlibro per kiu UEA omaĝas al William Auld kaj Marjorie Boulton okaze de ilia 75-a naskiĝdatreveno ĉi-jare.

D-ro Vilmos Benczik, prezidanto de la Belartaj Konkursoj kaj redaktoro de "Lingva arto", skizis en sia malferma parolado la historion de la Konkursoj. Krom esti la plej longedaŭra seninterrompa artkonkurso de Esperanto, la Belartaj Konkursoj de UEA forte markis la evoluon de la Esperanta literaturo de la lasta duonjarcento. Benczik elstarigis la kontribuon de Auld kaj Boulton al la Konkursoj, unue kiel multfojaj premiitoj kaj poste kiel juĝantoj. Estis do nature ke la lanĉo de la festlibro okazis lige kun la publikigo de la rezultoj de la jubilea eldono de la Konkursoj. Marjorie Boulton ĉeestis la lanĉon, tuŝante la korojn de la grandnombra publiko per dankparolado, en kiu fascine kuniĝis la klereco, humuro kaj modesteco de la amata poetino.

Konvena al la jubileo de la Konkursoj estis, krom la multeco de la konkursaĵoj, ankaŭ la alta kvalito en multaj branĉoj. Sekve ankaŭ la nombro de aljuĝitaj premioj estis pli granda ol kutime. Unika estis la aljuĝo de du unuaj premioj en la branĉo de teatraĵoj al Paul Gubbins. En tiu branĉo la ĵurio ja ofte ne trovas verkon, kiu meritus la unuan premion.

Ankaŭ ĉi-foje malkovriĝis novaj talentoj. La laŭreatoj de la unua premio en poezio kaj kanto, respektive Antonio Valen kaj Valentina Maria Nan, partoprenis unuafoje kaj tuj atingis la plej altan rangon. Sekve ne estis aljuĝita la speciala premio "Nova Talento", per kiu oni kuraĝigas novulon, kiu nur iomete maltrafas "ordinaran" premion.

Laŭ interkonsento kun UEA, la literatura revuo "Fonto" aperigos plej multajn el la premiitaj verkoj. UEA mem planas eldoni antologion de la unuaj 50 jaroj de la Belartaj Konkursoj.

Rezultoj de la Belartaj Konkursoj de UEA en 1999:

POEZIO

1-a premio: Antonio Valen (Hispanio) pro "Amafer' iama";
2-a premio: Stefan MacGill (Hungario) pro "Ercoj";
3-a premio: Goncalo Neves (Portugalio) pro "Amoroj";
Honora mencio: Goncalo Neves pro "Gagat'" kaj "Aglo".
Partoprenis 52 verkoj de 25 aŭtoroj el 17 landoj.

PROZO

1-a premio: Sten Johansson (Svedio) pro "Nepoj en Torento";
2-a premio: Sten Johansson pro "Kastelo de revoj";
3-a premio: Lena Karpunina (Germanio) pro "La ridinda letero";
Honora mencio: Jorge Camacho (Hispanio) pro "Ludwig".
Partoprenis 20 verkoj de 14 aŭtoroj el 12 landoj.

TEATRAĴO

1-a premio: Paul Gubbins (Britio) pro "Nun ni parolu" kaj "Kien la pruneloj kreskas";
2-a premio: ne aljuĝita;
3-a premio: Paul Gubbins pro "La forlasito".
Partoprenis 5 verkoj de 3 aŭtoroj el 3 landoj.

ESEO

Premio "Luigi Minnaja": Goncalo Neves (Portugalio) pro "Niaj verboj sen veproj";
2-a premio: ne aljuĝita;
3-a premio: ne aljuĝita.
Partoprenis 7 verkoj de 7 aŭtoroj el 7 landoj.

KANTO

Premio "Ahn Song-san pri Kanto": Valentina Maria Nan (Rumanio) pro "Ami";
2-a premio: Fiorello Fiorentin, teksto, kaj Aldo Fiorentin, muziko, (Italio) pro "Rifuĝintoj'; kaj Anja Karkiainen, teksto, kaj Vesa Polkki, muziko (Finnlando) pro "Kiam la folioj flavas".
3-a premio: Aldo Fiorentin pro "Pensoj pri la paco".
Partoprenis 10 kantoj de 6 aŭtoroj aŭ aŭtoraj duopoj el 6 landoj.

INFANLIBRO

Premio "Infanlibro de la Jaro 1998": Kroata Esperanto-Ligo pro
la libro "Mirindaj aventuroj de metilernanto Hlapic{'" de Ivana Brlic-Mazuranic, trad. el la kroata Maja Tisljar.
Partoprenis 3 libroj de 3 eldonejoj el 2 landoj.

VIDBENDO

1-a premio: Ralf Kuse (Germanio) pro "Esperanto en Mecklenburg kaj Vorpommern 1905-1944 (1-a parto)";
2-a premio: Brazila Esperanto-Ligo pro "Esperanto: komunikado kaj kulturo", reĝisorita de Ciro Gomes de Freitas;
3-a premio: Firdaus Ŝukurov (Taĝikio) pro "Malproksima eĥo de la Silka Vojo".
Partoprenis 5 filmoj de 5 aŭtoroj aŭ teamoj el 5 landoj.