Honora Membro de UEA, profesoro Salah Ghanem forpasis la 11-an de oktobro en Jdeideh, Libano. Li naskiĝis en 1933 kaj estis psikologo kaj tribunala spertulo pri grafologio. Ghanem estis unu el la pioniroj de Esperanto en sia lando. Li lernis la lingvon en 1960, kiam Paul Neergaard, gastprofesoro en la Amerika Universitato de Bejruto, instruis ĝin en la libana ĉefurbo kaj katalizis la fondon de landa Esperanto-asocio. Salah Ghanem prezidis la asocion dum multaj jaroj. En 1965 li eldonis lernolibron de Esperanto en la araba. Kiel Honora Membro de UEA li estis elektita en 2003.