La konata Esperanta verkistino, membro de la Akademio de Esperanto Anna Löwenstein prelegos dufoje en la 30-a Malferma Tago de la Centra Oficejo de UEA sabaton, la 25-an de aprilo. En unu prelego ŝi rememoros pri sia tempo kiel oficisto en la Centra Oficejo 1977-1981 kaj pri la tiama tre aktiva virina agado de UEA. En sia alia prelego ŝi rakontos pri sia verkista aktivado. Ŝia romano "La ŝtona urbo" aperis jam en kvar eldonoj kaj ĵus ŝi publikigis novan grandan romanon, "Morto de artisto". Ŝi verkis ankaŭ pri lingvaj temoj kaj lastatempe aperis en ŝia redakto artikolaro pri landnomoj en Esperanto, "Rusoj loĝas en Rusujo".

En la programo estos ankaŭ aliaj prelegoj, libroprezentoj kaj filmoj. La vizitantoj povos profiti de rabatoj en la libroservo kaj gajni esperantaĵojn en senpaga loterio. Kafo kaj teo, ankaŭ senpagaj, estos varmaj la tutan tagon. La programo daŭros de la 10-a ĝis la 17-a horo.