Laŭ proponoj de la koncernaj landaj asocioj la Estraro de UEA nomumis du novajn ĉefdelegitojn. En Finnlando s-ino Päivi Saarinen, vicprezidanto de la landa asocio, anstataŭas s-inon Heta Kesälä, kiu plenumis la oficon dum 15 jaroj. D-ro Keyhan Sayadpour fariĝis ĉefdelegito por Irano, kie dum pli ol 10 jaroj la ofico vakis, ĉar laŭ la nuna regularo pri delegitoj, akceptita en 1995, ĉefdelegito povas esti nur en landoj kun landa asocio aliĝinta al UEA. La pasintjara akcepto de Irana Esperanto-Asocio kiel landa asocio de UEA ebligis restarigi tiun gravan oficon.