- [EDU]-Novaĵoj: Ankaŭ edukado.net ricevis subvencion por interkultura Grundtvig-projekto: Ni kun ĝojo anoncas, ke nia retejo, kunlabore kaj kun helpo de la aliaj partneroj sukcesis ricevi subvencion kadre de la eŭropa Grundtvig-projekto. Interkulturo por tutviva lernado ege gravas. CENTRO DE INTERKULTURA EDUKADO (kunordiganto Halina Komar), partneroj en Nederlando (EDUKADO.NET, Katalin Kováts) kaj INTERKULTURA CENTRO EN HERZBERG AM HARZ...la Esperanto-urbo (Peter Zilvar, Zsófia Kóródy) sukcesis akiri agnoskon por eŭropa Grundtvig-projekto. Legu pli ĉe la paĝo: http://edukado.net/novajhoj?id=360

- EDU-RISKO: Kelkaj plibonigoj en la ludo: Jevgenij, nia programisto, malgraŭ siaj grandegaj taskoj pri la nove rekonstruata lernu.net, sukcesis dediĉi por nia ludo tempon kaj efektivigis jam preskaŭ ĉiujn el miaj modif-petoj. Kelkajn el ili vi ne vidas tuj, sed baldaŭ spertos, aliaj jam videblas de dekoj da horoj.

Mi esperas, ke malgraŭ tio, ke neniu komentis ilin, vi kune kun mi ĝojas pri tiuj plibonigoj.

Se eblus interveni en la programon kaj aranĝi, ke la hodiaŭaj demandoj rilatu al la enhavo de tiuj ŝanĝoj, mi certe farus. Sed ne eblas, mi neniel povas influi la vicordon de la demandoj, kaj ĉar ĉiu ludanto ricevas malsamajn demandojn, tiel nur kelkaj povus riskumi pri la novaĵoj. Pro tio mi simple lasas vin ĉiujn mem malkovri ilin.

Por tiuj, kiuj partoprenos konferencojn, kongreson aŭ aliajn Esperanto-aranĝojn mi deziras agrablajn kaj fruktodonajn programojn, renkontiĝojn kaj spertojn.

La aliaj konsoliĝu hejme, kaj ĝoju, ke ili ne estas forlogataj de eventoj kaj programoj, kaj povos senĝene ludi, lerni eventuale gajni.

Amike, Katalin

Ludu: http://edukado.net/ludoj/risko