Post nur kelkaj monatoj da lernado, Marie LIEBY decidis kanti ankaŭ en Esperanto. Post deko da jaroj da muzikado kaj kantado en la PIERRE SPECKER BAND', famkonata ensemblo en Elzaso, ŝi decidis sin prezenti soloe. Jam dum la internaciaj poeziaj vesperoj en la universtitato de Mulhouse, Marie kutimis agrabligi la interpoemajn paŭzojn per ludado per plej diversaj instrumentoj. Krome, sin akompanante per gitaro, ŝi kantis en diversaj lingvoj. Inter ili Esperanto!

Ŝia unua pli ol unuhora spektaklo ravis la partoprenantojn en la printempa staĝo de ESPERANTO FRANCE-EST en Benoîte-Vaŭ, apud VERDUN, komence de Marto. Antaŭ la spektaklo ŝi plej zorge agordis la mem kunportitajn amplifkilojn kaj inter la ravaj kantoj Marie plej lerte muzikis per diversaj kornemuzoj kaj flutoj.

Tondra aplaŭdado kaj biso estis la danko de la spektantoj, kiuj ege aprezis la belegan voĉon, la klaregan prononcadon kaj do la facilan kompreneblon de la kanzonoj. Ni ne dubas, ke ne mankos dungoj en plej diversaj Esperanto-aranĝoj tra Eŭropo.

Kontakto: marie.lieby ĉe hotmail.fr