Esperanto-Asocio de Finnlando okazigas tradicie du jarajn semajnfinajn eventojn: Vintrajn Tagojn en februaro aŭ marto kun la asocia jarkunveno kaj ceteraj ĉefe movadaj temoj, kaj Aŭtunajn Tagojn en septembro aŭ oktobro kun temoj kulturaj kaj turismaj. Kompreneble kun eroj amuziĝaj en ambaŭ. Tria tradicia evento estas juniaj someraj kursoj en la popolaltlernejo ĉe la ortodoksa monaĥejo Valamo.
Ni ĉiam bonvenigas alilandajn amikojn, kaj nun ni aparte vin invitas kaj instigas al niaj Aŭtunaj Tagoj 19. - 20.9.2009 en la sudokcidenta provinca urbo Pori/Björneborg (140 km norde de Turku/Åbo, 190 km sude de Vaasa/Vasa). Ni elektis la temon 200-jara Finnlando. La jaro 1809, kiam Finnlando estis eksigita de la sveda regno, estis turnopunkto kiu komencis la vojon al popollingva nacia emancipo. Kio kaj kiel, pri tio ni kolektas programon kun erudicio kaj arto.