La ĉefaj programeroj de la 30-a Malferma Tago de la Centra Oficejo de UEA (25 aprilo 2009) estis videoregistritaj de Francisco L. Veuthey. Ok filmoj, kun suma daŭro de tri kaj duona horoj, estas nun videblaj en Interreto ĉe la adreso

http://www.ipernity.com/doc/97850/home/video

Anna Löwenstein ĉefrolas en du filmoj. En unu ŝi rememoras sian deĵoradon en la CO antaŭ 30 jaroj kaj la tiaman virinan agadon de UEA. En la alia ŝi parolas pri sia verkista agado kaj precipe pri sia nova romano, Morto de artisto. Juán Besada prelegas pri la Esperanto-movado en Kubo, kaj Svetlana kaj Johan Derks pri sia ĵusa vojaĝo en Afriko kaj Esperanto-projekto en Burundo. La libroservisto Ionel Oneţ prezentas novaĵojn de sia vendejo kaj Douwe Beerda la aktivadon de Nederlanda Esperanto-Junularo. Al la ĉi-lasta filmo estas aldonita aprila elsendo pri Esperanto en la nederlanda TV.

Dum la Malferma Tago okazis repremiero de du historiaj filmoj. Tiu de H.J. Schut montras scenojn el la Internacia Junularkunveno en 1938, en kiu TEJO estis fondita; la alia, filmita de John Gobourne, el IJK kaj UK en Pollando en la Zamenhof-jaro 1959. Ankaŭ tiuj ĉi unikaĵoj estas nun spekteblaj en la videopaĝo de UEA.