La Malferma Tago de la Centra Oficejo de UEA evidente estas veter-imuna aranĝo. Malgraŭ somermeze belega kaj varma vetero ĝia 12-a eldono sabaton, la 13-an de majo, kolektis saman nombron da vizitantoj (85) kiel unu jaron pli frue en malpli bela tago. Krom el pluraj eŭropaj landoj, po du vizitantoj venis eĉ el Brazilo kaj Japanio.

La ĉefgasto estis Gian Carlo Fighiera, iama KKS de UEA kaj multflanka movada aktivulo. Li prelegis trifoje pri la obstakloj kaj ŝancoj, kiujn li vidas por Esperanto en la tria jarmilo. Grandan atenton li donis al la decida rolo de UEA tiurilate. Kiel Fighiera atentigis, almenaŭ naŭ el dek esperantistoj referencas al UEA, sendepende de tio, ĉu ili mem membras en ĝi. Laŭ peto de UEA Fighiera prilaboros sian prelegon, konsiderante ankaŭ la ideojn el la viglaj postprelegaj diskutoj, por aperigo en la serio de Diskutkajeroj de UEA.

Krom aŭskulti al Fighiera, spekti filmojn kaj babili ĉe la kaftablo, la gastoj ankaŭ multe butikumis en la libroservo, kiu vendis dum la tago por 4816,69 guldenoj. Ĉefe furoris novaj libroj de UEA, kiel "Paĉjo, kio estas rasismo?" (10 ekz.), "Esperantaj sinonimoj" (8), "Kio estas demokratio?" (6) kaj "Hejma vortaro" (5). Inter la verkoj de aliaj eldonistoj elstaris la romano "La ŝtona urbo" de Anna Lowenstein (7).

Jam nun la Centra Oficejo invitas por sia sekva Malferma Tago, kiu okazos la 25-an de novembro.

Jam por la 13-a fojo pleniĝis de vizitantoj la sidejo de UEA en Roterdamo dum la Malferma Tago sabaton, la 25-an de novembro. Entute 110 gastoj el 12 landoj ĝuis programon, kiu fariĝis pli riĉa ol antaŭanoncite.

La ĉefa gasto estis Spomenka Stimec, unu el la plej elstaraj nuntempaj Esperanto-verkistoj, kiu dufoje prelegis pri sia verkista aktivado kaj aŭtografis siajn librojn. Ĉar ŝi estas sekretario de la Loka Kongresa Komitato de la 86-a UK, ŝi uzis la okazon ankaŭ por doni freŝajn informojn pri la kongresaj preparoj.

La librokulturan funkcion de la Malferma Tago plie emfazis la lanĉo de la Esperanta eldono de La lada tambureto de la Nobel-premiito Gunter Grass. Ĉeestis kaj la tradukinto Tomasz Chmielik, kiu prezentis ĝin, kaj la eldoninto Georgo Handzlik, kiu regalis la publikon ankaŭ per trobadora koncerto.

En la plenŝtopita biblioteko de UEA, kiu cetere funkciis kiel kinejo de Esperanto-filmoj, okazis krome prelego de Renato Corsetti, vicprezidanto de UEA, pri la nun preparata laborplano de UEA.

Por la libroservo de UEA la tago estis aparte laboriga. Libroj kaj aliaj varoj vendiĝis je la suma valoro de 4249,65 eŭroj (9365 guldenoj), kio estas la dua plej bona rezulto en la serio de Malfermaj Tagoj. Pleje furoris murkalendaro dediĉita al la Zagreba UK (28 ekz.), la romano de Grass (16) kaj nederlanda Esperanto-gramatiko (13).