Universala Esperanto-Asocio

Biblioteko Hector Hodler enhavas plurajn atestaĵojn el la historio de E-movado. Por interesita esploranto ĝi ŝajnas trezorejo, plena de mirindaĵoj... En tiu ĉi paĝo vi povas konatiĝi kun kelkaj el ili.

1887 — 1920
1912	Foto-albumo de la 8-a Universala Kongreso en Kraków, Pollando
	Unika albumo en kiu oni trovas fotojn de ĉiuj(!) partoprenintoj. Tiu ĉi foto montras disdonadon de premioj en la Literatura Konkurso.
1921 — 1930
1925	Komuna libro-stando, UK Ĝenevo
	Kunlaboris 3 eldonejoj: Ferdinand Hirt kaj filo, Leipzig Centra Librejo, Paris Ellersiek & Borel, Berlin. Vd. la foton ankaŭ en Revuo Esperanto, 1925, p. 153.

1925	"Eretz-Israel kaj Esperanto"
	La Esperanto-movado en Palestino/Israelo komenciĝis en 1921, post la enmigro de du aktivuloj. En 1924 ekaperis Hebrea Esperantisto, en 1925 okazis kunveno en Jerusalemo. Tiu ĉi 4-paĝa reklamilo, malĝuste en BHH metita al la revuoj, mencias kontaktadresojn kaj klarigas iomete la lingvon.

1925	La unuaj lernantoj de Esperanto, Hamadan, Persujo
	En la jaro 1925 Revuo Esperanto (p. 27) mencias eventojn en diversaj persaj urboj, sed nenion pri la urbeto Hamadan (30.000 enl.), sudokcidente de Teherano. En tiu tempo nur la UEA-Jarlibro de 1926 informas pri loka Delegito, la instruisto Mohamed Labib. Laŭ anglalingva retpaĝo la patro de la lande fama lingvisto Eshan Yarshater estis komercisto, kiu lernis la araban kaj Esperanton. La lingvisto mem naskiĝis en 1920 en Hamadan - li povus esti la eta knabo supre, sed tio estas pura diveno.
1931 — 1940
1933	Foiro de Budapest varbas esperante
	En pli fruaj tempoj surprize multaj kompanioj kaj foiroj varbis ankaŭ en Esperanto. Dum 1920-1939 eldoniĝis precipe multaj reklamoj pri foiroj en Liono, Leipzig, Reichenberg (nun Liberec en Ĉeĥio), Vieno kaj Budapest.

1937	Mapo de "Manĉoŭkŭo"
	En Azio la Dua Mondomilito komenciĝis pli frue. Jam en 1932 Japanio konkeris nord-orientan parton de Ĉinio, organizis kruelan ekspluatadon kaj kreis satelitan ŝtaton "Manĉoŭkŭo". Ĝis la 1940aj jaroj la japanaj esperantistoj ankoraŭ rajtis agadi, kvankam kun limigoj. Eldoniĝis pluraj esperantlingvaj reklamiloj ekz. de la ŝtata fervojo. "Ek al Manĉoŭkŭo!" el 1937 invitas per 26 paĝoj turismemajn japanjon al tiu kompatinda lando. Malantaŭe en la libreto estas esperantlingva mapo de "Manĉoŭkŭo".
1941 — 1950
1946	"Kie loĝas esperantistoj", Nederlando
	Impona mapo pri la disvastiĝo de Esperanto en Nederlando.
1951 — 1960
1956	Varbilo por la UK Kopenhago
	La unuan fojon en Kopenhago (poste ankoraŭ du fojojn) la Universala Kongreso troviĝis en 1956. Elektiĝis, same la unuan fojon, Giorgio Canuto kiel prezidanto de UEA.

1957	Reklamo de KLM
	Proksimume en la jaro 1957 la nederlanda flugkompanio KLM eldonis reklamilon en Esperanto.
1961 — 1970
1962	Invito al la IJK en Ystad
	Se nur 70 homoj partoprenis al la "Internacia Junulara Kunveno" de 1962, tiam kulpis ne la aliĝilo. Laŭ Revuo Esperanto (1962, p. 178) oni volis kongresi origine en Danio, sed devis "translokigi" ĝin al Svedio. La organizantoj loĝis dise tra la lando, kaj pro la mallonga prepar-tempo la kotizo estis tre alta. "Dum la kongreso estis elektitaj: 7 estraranoj, 4 komisiitoj kaj 1 Miss-Esperanto, Marianne Bergman el Svedujo.".

1966	Germana ŝtata informilo en Esperanto
	En la jaro 1958 la unuan fojon aperis la informlibro "Faktoj pri Germanujo", eldonaĵo de la oficiala informejo de FR Germanio. Tiutempe oni ankoraŭ emfazis, ke la orientaj teritorioj de la Germana Regno, aneksiitaj de Pollando kaj Sovetunio, laŭ la Potsdama konferenco nur provizore estas administrataj de tiuj ŝtatoj. Tiu ĉi skano estas el la tria eldono el 1968. .
1971 — 1980
1971	Reklamo por pago de UEA-kotizo
	Ĉu vi jam pagis vian UEA-kotizon? Esperinde ne, ĉar tiam vi ne ricevis tiun ĉi reklamilon el la jaro 1971. La folio konserviĝis hazarde, uzita kiel kovril-paperaĵo en la CED-arkivo..
1981 — 1990
1986	Titolpaĝo de Revuo Esperanto pri la UK en Pekino
	En 1986 la Universala Kongreso okazis je la unua fojo en Ĉinio, kaj je la dua fojo en Azio (post Tokio 1965). La septembra numero de Revuo Esperanto tradicie raportas detale pri la kongreso. Osmo Buller kaj Simo Milojeviĉ, la redaktoroj, montris sur la frontpaĝo bildon de la ĉefa salono kaj fotojn de la LKKanoj. Supre dekstre Zhang Qicheng, vicprezidanto. La UK de Pekino estis tre sukcesa, kun pli da partoprenantoj ol la antaŭan jaron en Augsburg, Germanio. Okazis eĉ balotoj de la Estraro - en antaŭaj jaroj oni ŝovis la balotojn ofte al jaroj kun eŭropa kongreso.

Supren

UEA, 2026