Resonanco estas vorto kiun ĉiuj homoj regule uzas en diversaj situacioj. Ĝi ja rilatas al multaj eventoj, kiam energio de iu sistemo transiras al alia sistemo kun granda efiko. Ĉiuj infanoj nekonscie uzas la leĝon de resonanco por funkciigi balancilon sen peno. Tiu fenomeno agas je ĉiuj niveloj de fizikaj sistemoj. Kiel bona ekzemplo, eblas mencii muzikajn instrumentojn kies bona funkciado postulas agordon laŭ specifaj frekvencoj. Mi mem spertas pri unu el la plej gravaj inventaĵoj de la 20a jc, nome la lasero kiu nuntempe utilas en ĉiuj kampoj de homa agado kaj baziĝas sur la bona uzo de la leĝo de resonanco. En tiu artikolo, mi prezentas la bazajn principojn de la resonanca fenomeno, pere de sistemoj sufiĉe konataj de la ĝenerala publiko. La homa korpo ne estas aparta sistemo kaj havas siajn specifajn naturajn frekvencojn. Nia bonfarto dependas de fluo de energio rilate al tiuj frekvencoj. Surbaze de fizikaj klarigoj, mi prezentas utilecon de la resonanca leĝo en la ĉiutaga vivo, kiel ekzemple piediri je granda distanco kun minimuma laceco.