Estas bone konata ke lumo, kiel fundamenta formo de energio, ludas gravan rolon en ĉiuj vivprocezoj. Temas unue pri sunlumo, kiu disponeblas en specifa kvanto depende de la loko kaj de la momento dum la jaro. Pro tio homoj disvolvis strategiojn kaj metodojn por uzi kiel eble plej efike la ecojn de lumo, videbla kaj nevidebla, por resti sana aŭ resaniĝi. En la prelego ni prezentos kaj diskutos la efikojn de lumenergio sur la korpo. Multaj metodoj baziĝas sur veraj fizikaj ecoj kaj donas bonajn rezultojn; kelkaj estas dubindaj kaj funkcias esence dank'al la kredkapablo de la pacientoj.

Nova erao por lumterapio komenciĝis kiam lasero estis inventita en 1960. La lumo eligata de tiu artefarita fonto havas ecojn kiuj povas esti precize adaptitaj al la celata uzo. La kombino de artefarita inteligenteco kaj de precizeco de laserlumo ebligas krei novajn instrumentojn je la dispono de kuracistoj. En la prelego mi priskribas tiujn ecojn kaj prezentas kelkajn ekzemplojn de terapioj pere de lumo, kiuj ne estis imageblaj antaŭe.